臺灣是sàn-bah掠上濟的國家，這馬嘛已經是sàn-bah的產季，毋過今年到今，掠著的量只有往過的一成。學者表示，今年日本漁船仝款是掠無魚，可能佮海洋環境，以及sàn-bah洄游路線改變有關係。

8月底，隆順發1號漁船閣佇前鎮漁港猶未出海，往過這時陣，漁船早就出港去公海掠sàn bah，毋過船長已經聽人講，今年魚仔誠僫掠。

毋但煩惱掠無魚，船長嘛擔心海頂拄好做風颱，決定延後出海日期，出發進前愛先拜拜，祈求會當大船入港。毋過捌隻漁船大概6月就已經出海，目前台灣已經有80外隻船佇日本附近的公海作業掠sàn bah，到今閣無船仔轉來落貨。

因為今年猶無船仔載魚鮮轉來，實際來到業者的倉庫，干焦賰遮幾箱仔舊年的sàn bah，市面已經無魚通吃，業者按算今年一定會起價，佳哉刀魚的大月是中秋節前後，一直到11月，業者希望後期的量會當彌補不足。其實日本今年sàn bah 的量仝款誠慘，只有往過的1%，學者認為，佮這幾年海洋環境改變有真大關係。

船長講，這馬日本漁船嘛會走來公海對台灣漁船掠魚，全球氣候變化，影響海洋資源，若是沒管制掠魚，未來sàn bah減量恐驚會是趨勢。