高雄市有一陣講故事的志工媽媽，組成行動故事媽媽劇團，四界去庄跤的學校佮圖書館表演，今年歇熱，劇團特別安排十外場的臺語故事表演，這寡媽媽所期待的，就是囡仔共母語抾轉來。

蓋趣味的狐狸佮猴山仔，小朋友看了笑咍咍。搬演的內容是囡仔冊，遮的演員攏是志工媽媽，佇高雄誠濟圖書館佮庄跤學校，攏會使看著in。

為著這擺台語故事活動，拜三下晡，in先來排練，這个劇團的團長是上重要的人物，台語劇本是伊改編的。

多數演員有囝有家庭愛顧，逐家攏是揣時間來鬥相共，親像這位演水雞的媽媽，對台北嫁來高雄才學台語，雖然閣講袂輾轉，嘛願意挑戰。

因為逐家攏是志工，所以表演的道具嘛攏是in家己親手做出來，好佳哉有這位美術專長的成員，會曉用上俗的材料做道具佮布景。

為著囡仔的笑容，劇團每冬四界表演，有華語嘛有台語，今年歇熱連紲安排11場台語故事予囡仔看，那耍那學，希望阿公阿媽嘛會使tshuā孫仔做伙來講台語。