李登輝專題 看臺灣社會各面向的意識開放

公視台語台「再見民主先生」新聞專題，今仔日欲tshuā觀眾看，臺灣各面相的意識按怎有自由的空間，咱的教育內底，當時出現了解臺灣的內容咧？這寡臺灣的點點滴滴，也攏佮李登輝有真大的關係。


行入國立台灣文學館，台灣唯一的國家級文學博物館，也是百年歷史的國定古蹟，所有和台灣近代文學有關係的史料攏收集佇遮，頭一任博物館館長鄭邦鎮講，佇1990年，李登輝執政時代，李總統就指示文建會成立台灣文化資產保存中心，下底的台灣文學史料組，就是台灣文學館的前身。

李登輝也佇伊當選民選總統的第二年，請國立編譯館編三本紹介台灣地理、歷史和社會的教科書，冊名叫「認捌台灣」。捌做過「台獨聯盟」主席，佇彼年當選台南市長的張燦鍙，也肯定這項政策。

這也是自1989年，七个民進黨佮無黨籍的縣市長，開始編「鄉土教材」以來，上蓋大的進展，搪當時的宜蘭縣長游錫堃，講著這層代誌，感想猶原真深。

2000年李總統落任了後，伊閣設李登輝學校，免費栽培對台灣社會發展有意識的後輩。

李前總統推動民主教育、毋但落實佇課綱內底，伊也望後輩大量吸收知識，做為行動的基礎，促成改變。