美軍透早飛過臺灣領空 倚晝共軍也捌飛入來

早起，美國的軍方一隻C-40A這款形體運補的飛機，飛過臺灣的空中，按基隆、臺北、新北，一路往南行10縣市才閣踅出去海面。中晝彼陣，中國解放軍煞也派出幾若隻「SU-30」這型的戰鬥機，飛入來咱國西南爿，空中界管的範圍內。咱的國防部毋但有播音主動警告，也派出空中的偵察機來警戒。

美國軍方一隻「C-40A」這款形體的運補飛機，早起8時53分，按日本「OKINAWA」的NAHA機場起飛了後，對咱台灣基隆這爿入來。行過十縣市，尾手，對臺南市的半空中，踅對南海彼方面去，早起11點，這隻飛機飛過越南，入去到「柬埔寨」的領空內底。抑過無偌久，中國的解放軍，煞也派出幾若隻戰鬥機，飛入來咱國西南爿，空中的範圍內面。國防部今嘛強調講，臺灣海峽四邊海面、空中的狀況，攏有充分掌握，閣會積極應變，望國民著愛安心。