屏東縣要求老師校內手機仔關機 縣府:無強制

就是這份公文，屏東縣政府發函予屏東縣內，200外間高中以下學校，公文內容寫著，教職員工佇校園使用行動載具，除了教學引導和緊急連絡以外，攏以關手機仔為原則。甚至閣講若欲使用手機仔翕相錄影，愛先經過學生家長同意。聽著這種要求，學生家長攏感覺無合理。

家長 陳先生
這馬手機仔對逐个人需求誠大老師若連手機仔自主權攏無對老師無啥好

家長 張小姐
叫老師佇學校關機真正傷譀都毋是佇軍營這馬毋管是學校內部的通知抑是老師和家長的聯絡有群組較緊只要老師上課的時陣莫開聲音就好矣做一位家長我足感謝老師佇重要的時刻替囡仔翕相

全國教育產業總工會講，針對屏東縣政府的要求，有袂少老師表示不滿。 全教產嘛質疑，老師予人要求關機，但是下班了後煞需要24小時待命，嚴重侵害老師的勞動權益，而且縣府攏無先參教育團體討論就直接發公文，做法無妥當。

聲音來源：屏東縣老師(變聲處理)
老師若有兼任行政的抑是班上有特殊學生的攏是愛隨時紮手機仔

全國教育產業總工會理事長 林蕙蓉
老師佇學校關機 轉去厝愛開機無敢有需要接家長的電話無閣有各種的評鑑 校務評鑑 特教評鑑攏需要大量的相片請問遮每一張敢攏愛經過家長同意

屏東縣政府教育處副處長 吳佩珊
縣府提醒老師無經過同意的學生的影像毋通隨便翕抑是傳出去以符合規个個資法和肖像權的規範

對此，縣府教育處回應，in是照教育部的使用原則，提供學校訂定管理規範的參考，適用對象有老師佮學生，毋是只有針對老師。教育處嘛強調，實際規則是需要討論了後，經由校務會議通過後才會實施，是希望校園使用手機仔有一个規範，避免爭議。

記者 許猛㨗 屏東報導