70歲以上強制換駕照 著健檢、上安全教育課

71歲的沈文程，唱歌起來閣足有力的，毋過若講著駛車，就需要閣考驗看覓矣。

為著欲降低高齡駕駛交通意外的發生率，交通部推動「高齡換照」的新政策，毋過也強調毋是欲禁止序大駛車，嘛毋是講駕照愛重考。交通部強制要求70歲以上的序大，換駕照著愛通過病院的健康檢查，而且也著完成安全教育課程。

交通部公路局長 林福山：「明年5/1施行了後，大概70歲以上到74歲，大概有110萬人次；明年滿75歲的部份，大概18.8萬人次。所以大概明年的部份是有128萬。」

另外，為著欲鼓勵70歲以上的序大，主動共駕照交轉去，改坐大眾運輸，公路局逐冬也撥2.5億的經費，予長輩使用TPASS的優惠方案。

交通部長 陳世凱：「阮這馬駕照繳轉去，阮有TPASS的優惠方案，其實庄跤嘛毋免掛心，因為阮強欲逐个庄跤的鄉鎮，攏會有幸福bá-suh佮幸福計程車的設置。」

針對序大的議題，弘道老人基金會也做一份調查，發現定定佇社群頂面，序大定予人貼負面標籤，親像高齡駕駛、暴衝、無照等等。基金會希望鼓勵民眾共高齡駕駛，改講是高齡交通安全；共老人問題，改唸做老人議題。

弘道基金會執行長 李若綺：「事件當中去特別突顯高齡者交通事故發生的時陣，阮閣用這个字詞的時陣，其實逐家就會對高齡駕駛，貼上一个（無好的）標籤。」

基金會希望會當鼓勵民眾換一種講法，用友善的方式來對待序大，嘛通進一步改變社會對老化的負面態度。

記者 鄭亞宣 王志剛 臺北報導