政大斯拉夫語系舉辦活動 介紹捷克民主政治

紀錄片「Citizen Havel」 (翻翕Youtube頻道 JihlavaIDFF):「各位政府官員、各位來賓，我希望成做一个好總統。」


紀錄片「公民哈維爾」，紀錄1992年捷克斯洛伐克共產政權解體了後，捷克第一任總統哈維爾上任以後的每一工，伊是反霸權的哲學家、戲劇作家嘛是反共產主義者。佇前總統陳水扁任內，捌來臺灣拜訪，咱嘛頒勳章予伊感謝伊公開伨臺灣加入聯合國。今第六屆「捷克日佇政大」的系列活動，嘛欲放這齣紀錄片，予閣較濟人了解捷克的民主政治。

捷克經濟文化辦事處代表 David Steinke:「（相片內)就像穿一領皇家的長幔，哈維爾伊坐佇椅仔頂面，代表權力，伊閣咧笑，然後咧引言有寫著，身在權力當中使我永遠懷疑家己，這就是哈維爾。」
 

捷克中心臺北主任 Markéta Lipold Záhumenská:「我希望參觀者會當閣較了解伊，因為對阮捷克人來講伊是一位非常重要的人物，我相信伊也是20世紀，歐洲上重要的道德人物之一。」


除了放紀錄片，捷克嘛佮政治大學斯拉夫語文學系共同規畫特展，完整呈現捷克前總統哈維爾的一生，見證捷克行向自由和民主的過程。系主任表示，紲來的活動猶閣有捷克舞蹈工作坊和論壇，希望透過捷克和臺灣的學術交流，了解哈維爾對當代社會的影響。

政大斯拉夫語文學系主任林蒔慧:「拜四阮會有一个大型的論壇，阮邀請捷克的學者閣有臺灣的學者，總共有六位，然後會去討論逐家對哈維爾的形象，想像是啥物對當代社會閣有啥物款的影響力。」


「捷克日佇政大」的系列活動，自28開幕攏總兩禮拜，系主任表示，捷克和臺灣咧歷史和民主化過程，有真濟相siāng的所在，希望透過遮的活動，通促進民眾對捷克的了解。

記者 呂尚儒 莊浚佑 臺北報導

(新聞標題、導言及內文皆為台語文)