這幾年濟濟人文學科，拄搪招生困難的挑戰。毋過台北教育大學台文所，煞傳出明年欲加設大學部的臺文系招生。台文所長表示，因為目前國校仔正式的台語師資猶閣真欠，未來系裡除了原本的文學和歷史的研究專長，欲閣發展台語師資教育，嘛向望栽培出有臺灣文史底蒂的人才，佇各產業發展。（新聞標題、導言及內文皆為台語文）
「就是伊有一寡文學作品以外，其實廣告嘛是一个部份。廣告，有，真趣味，所以你會當看無仝款的時代，怹彼當陣可能時行啥物。」
老師詳細解說1885年創刊到今的《臺灣教會公報》，這也是臺灣上早的新聞刊物。臺北教育大學臺文所，傳出明年欲加設大學部臺灣語言佮文化學系。所長蘇瑞鏘表示，目前國校仔正式的台語師資猶閣真欠，今得著教育部的允准，未來系裡佇文學和歷史的研究專長以外，欲閣發展台語教育、栽培師資。
臺北教育大學臺文所長 蘇瑞鏘：「阮是三種攏有，所以阮是希望講，將來若講學生出去教冊，抑是講伊若無欲教冊，就去外口做各行各業，對伊來講毋但講伊台語這部份，算講足專業的，其實伊本身臺灣歷史、臺灣文學，伊彼種基礎嘛足好的。」
教育部高教司長 廖高賢：「112學年度到114學年度，語文學門相關系所的新增案，外國文學語文類的占大多數。因為臺灣語言發展，是國家重要的一个發展政策，所以本部是有鼓勵大學校院，來開設相關的一寡，國家語言的課程。」
另外，助理教授王桂蘭也指出，雖然全臺灣有濟濟臺文相關系所，毋過無一定有師培課。以北部來講，就猶真欠國小的師資培育科系，未來北教大開設台文系嘛會有編寫教材、台語教材教法等等的課程。
臺北教育大學臺文所助理教授 王桂蘭：「小學的師資培養，基本上是咱臺中教育大學有咧做；若是以北部來講目前是較欠缺，因為咱臺師大主要做的是，中等教育的部份，所以我感覺若是咱明年成立，就是北教大有成立臺文系，這方面咱佇小學的師資這方面，其實會當來做真濟的拍拚。」
這幾年濟濟人文學科拄搪招生的困境，毋過所長蘇瑞鏘認為北教大台文系未來的目標真明確，栽培台語師資是一部份，另外一方面嘛向望培養有臺灣文史底蒂的人才，佇各產業湠根發展。
記者 呂尚儒 莊浚佑 臺北報導