育成高中有學生下課搬布袋戲 網路引起轟動

「佛字結、萬佛結，就是講佛字伊是一个結；就是講，佛教的圖案。這个算，徛算若回字文，這攏是吉祥的。」

聽學生詳細解說刺繡的意義，不止仔專業，而且遮的布袋戲尪仔衫、帽仔和刺繡攏是伊的作品，伊是臺北市育成高中的學生王辰宇。9月初3至初5的時，咧校內練習布袋戲，有上百个學生圍觀，嘛咧網路造成轟動。學生講伊從細漢就對傳統藝術真有興趣，家己學搬布袋戲，然後國中的時去揣師傅學到今，伊講嘛無想著這改佇學校搬戲會遮爾受著歡迎。


臺北市立育成高中學生 王辰宇：「去（揣師傅學）的時陣，我一寡攏會曉做矣，但是做袂幼膩、做袂媠。去遐算講，知影講欲按怎做，這个戲齣欲按怎做才會好看，有彼个氣口；物件按怎做才會點陳。」

雖然咧表演第三工的時，雄雄去予老師阻止，校方解說講是因為有學生欲打賞、牽涉著金錢較無妥當。但是針對學生佇校內搬布袋戲予同學看，校長和主任攏表示支持，肯定學生深化興趣自主學習，嘛真歡喜校內有這款「國寶」。

臺北市立育成高中學務主任 洪國銘：「閣來（學校）有足濟活動，有校慶、有佮日本人的交流、學生的交流，按呢阮攏會透過這種交流，來予學生來表演，咱臺灣的彼種民俗文化。」

學生王辰宇表示，經過這擺的代誌，會當予同學接觸和欣賞布袋戲，伊感覺是難得的機會。為著欲鼓勵學生接觸傳統藝術，育成高中表示，未來按算會加辦一寡文化活動，嘛會結合本土語言課、表演藝術課來予學生愈了解臺灣的傳統藝術。

記者 呂尚儒 莊浚佑 臺北報導