今年桃園發生老師因為學生成績無好，提美工刀仔講欲傷害家己，來恐嚇學生愛認真讀冊，造成學生囡仔真驚惶。佇教育現場，老師若是一時情緒失控，對學生對學校攏是無好的代誌。教師團體指出，老師工課負擔大，閣面對教育現場的各種壓力，久來，心理健康真有可能就會出問題。
根據統計，新北市高中以下的師生比，國小、國中、高中攏比全國的平均較懸，所以新北市教育局特別提供老師，逐年有六改的心理諮商服務，希望消敨老師的壓力。猶毋過有教師團體指出，申請諮商服務有條件的限制，配合的諮商所數量嘛傷少，有看有用無的情形。
新北市教師會總幹事 蔡淑遠：「老師若有愛考核的案件，老師就袂當申請（心理）支持系統，猶毋過這个濫訴的案件，規个申訴的過程可能真長，老師的心理和身體攏會真疲勞。」
臺灣教師聯盟理事長 潘威佑：「逐個月提供一擺穩定的（心理）支持，而且增加線頂的諮商和無記名的平台，而且愛引進教育心理師的制度，鼓勵培育和聘請有教育專業背景的心理師。」
根據新北市的資料，目前新北有超過1萬个老師，有超過1400人捌去尋求心理諮商協助，等於每10个老師就有1个需要支持，有新北市議員認為，教師面對的狀況百百款，可能是教育專業的問題，嘛有可能是家己的心理需要調整，希望教育局會使整合各種資源，針對心理和教育提供無仝專業的支持。
新北市議員 黃淑君：「教育局怹第一線，接觸著遮的老師的時陣，會當初步幫伊判斷講，你可能是教育懸頂，你可能專業，有一寡仔會當補充的部份、提升的部份，阮請專業的教育團隊、專業的衛生醫療（心理）資源，抑是講地方的教育資源，咱愛提供老師無仝款的選擇。」
黃淑君議員也指出，每一个老師的心理狀況攏無仝，諮商無應該是用幾擺來規畫，應該愛針對無仝狀況提供協助，呼籲中央整合醫療和諮商的資源，來幫助規个教育現場閣較健全。
記者 魏宗仁 謝季潾 臺北報導
新北老師教育壓力大 教育局提供諮商1年6改
發布時間：
最後更新：