祈求蛇年平安順序 臺南廟宇點燈、祭改信眾濟

若運途無順，民俗信仰中，民眾會去廟宇提替身，由法師進行祭改儀式。這陣平常日廟內嘛排甲躼躼長，攏是等欲改運化解。毋但祭改，嘛有真濟信眾會透過點燈來求平安。傳統上，真濟人會揀春節期間「行春」順紲點燈，毋過這陣猶原有濟濟人到廟咧點，這款情形並往年較明顯。

民眾：「（逐冬攏有點喔？）著啊，逐冬攏愛。」
民眾：「祈福家己新的一冬會當過甲較順利咧。」
正統鹿耳門聖母廟副主委 陳祈富：「神明暗中咧保庇，無形咱嘛看袂著。這馬就毋是干焦濟歲人才來拜拜點燈，這馬少年的嘛並長輩來點燈較濟。」

以臺南正統鹿耳門聖母廟來看，今年廟內點燈數量已經超過10萬外葩，比舊年增加一成；若玉皇宮嘛仝款，尤其太歲燈名額攏滇矣。另外，有道長指出，今年參與「拜斗」祈求元辰光彩的信徒嘛閣較濟。文史工作者分析，這款集體性點燈、祭改的行為，可能參社會普遍「集體煩惱」有關係。

文史工作者 鄭道聰：「雖然疫情過矣，毋過流感猶原咧湠，所以真濟人會無小心過身。最近嘛幾个明星過身，就是性命若變甲遮爾脆弱，這是煩惱感來的原因；兩岸關係緊張嘛是一个原因。」
臺南安平道壇道長 王浤儒：「今年度來點燈拜斗的人增加一倍，嘛有集體、公司。有人來拜拜感覺感應袂bái，所以嘛有公司佮一寡團體來。」

文史工作者表示，舊年經濟狀況無穩定，國內外政治局勢變化大，這嘛攏影響百姓的安全感。信眾透過宗教來尋求心靈的倚靠，向望予今年有信心度過各種難關。

記者 李晨宇 臺南採訪報導