年度十大藝文新聞 「英國國家畫廊來臺」排頭名
發布時間：
更新時間：
臺北藝術大學逐年攏會做調查，了解民眾上要意佗一寡藝文新聞，來排名「年度十大藝文新聞」。今年英國國家藝廊，共拉斐爾、梵谷等等出名畫家的作品集合到奇美博物館展出，這个展覽是年度十大藝文新聞的頭名。另外咱佇巴黎文化奧運期間，濟濟台灣藝術家到巴黎表演，展現台灣的文化，也入選十大藝文新聞的第三名。（此則新聞標題、導言、內文皆為臺語文。）
英國國家藝廊200年，怹佇今年5月到9月，到奇美博物館辦展覽，展出文藝復興時期拉斐爾的畫作，到後印象派畫家梵谷的作品，共世界性的藝術品tshuā入來台灣，每一幅圖，攏是世界出名的經典畫作。這條藝文界的大事項，予人選做今年十大藝文新聞頭名。
奇美博物館基金會董事長郭玲玲表示：「英國的國家藝廊願意佇200年頭擺來臺灣，佇臺南的奇美博物館通呈現共怹52張大師的作品，阮也見識臺灣民眾對藝術的熱情，閣有參展的高度素養。」
今年八月巴黎文化奧運，有122个來自台灣的藝術家到法國巴黎，辦57場公開演出，累積超過7萬人次參訪，台灣辦喪的傳統民俗——牽亡歌，也佇法國巴黎表演。透過巴黎奧運，予台灣的文化行向世界，巴黎文化奧運也入選十大藝文新聞第三名。
北藝大藝術行政與管理研究所兼任教授—項薇表示：「咱的藝術家也到國外，其實這是一件好代，咱就予國際看著咱、咱也通看著國際，我感覺是互相的、是共榮的，有一个是光榮、共榮的『榮』，閣有一个是融合的『融』。」
北藝大講，透過這兩條新聞，通了解引進世界藝術到台灣、閣有輸出台灣藝術到世界，攏是民眾真要意的代誌。另外，電影導演李安得著日本藝術大賞、2024臺灣文博會佇臺南舉辦、0403大地動致使59搭文資受損等，攏入選十大藝文新聞。北藝大講，入選面向多元，顯示愈來愈濟民眾關心無仝的藝文公共議題。
記者 郭柏均 林郁凱 台北報導
盧元媜/編輯
