青少年10大議題調查 望做政府未來施政參考

月初，台中國小校園傳出疑似霸凌事件，毋但同學，校方主任也涉嫌霸凌。國教行動聯盟指出，霸凌議題受著關心，校園霸凌的事件也一再發生，雖然有管道會使予學生申訴，但是學生敢知影按怎申訴、敢敢申訴、顧慮啥物，加上設計制度的攏是大人，對學生囡仔來講，有可能設想就無夠齊全。

師範大學社會工作研究所碩的學生李雨函表示：「大人也有關注著霸凌問題，但是囡仔其實對這个議題真濟是毋知會使按怎做的，特別是彼寡予人霸凌過的囡仔，in可能會講in捌共老師反映過，但是老師的反應可能是講同學咧滾耍笑、抑是請囡仔去申訴，但是對國小、國中生來講，聽著『申訴』這兩个字是真生份的，in根本毋知按怎做。」

國教聯盟認為，真濟佮囡仔、青少年有關係的政策，攏罕得聽囡仔的心聲，也較袂對囡仔的角度去思考，親像討論甲真熱的「逐班啉牛奶政策」。聯盟表示，政府推動「班班啉牛奶」政策，雖然本意真好，但是有的囡仔討厭啉牛奶、有的囡仔啉牛奶會落屎，這寡來自囡仔的聲音，定予人無注意著。所以國教聯盟按算透過社群媒體，針對國小五年仔到高中三年仔的學生進行電子問卷，去了解「青少年要意啥款議題」，希望收集3千份調查，明年一月公佈調查結果，予政府做參考，向望以後訂政策愛對囡仔的角度去思考。

記者 郭柏均 王興中 臺北報導