風颱連紲來、雨濟水變汫 臺南七股蚵仔死9成

這陣是臺南七股內海蚵仔的產季，煞因為今年風颱雨水濟，海水變較汫，致使蚵仔死甲春一成，一斤是起到250箍。做食的業者嘛受影響，有人是買進口的來塌，嘛有人無顧成本、堅持欲用在地的。

農民手無閒咧剁蚵殼，拍開的蚵仔細mih閣真瘦，照理講這陣是七股潟湖蚵仔的產季，煞無啥物農民咧鋟蚵仔，農民講，受著今年風颱影響，蚵棚攏摃無去，遮的蚵仔死甲賰一成，這是近年來上嚴重的一改，農民嘛干焦會當加減罔窮，窮寡本錢轉來補貼。

蚵農表示，「這馬就攏無蚵仔用矣，往過若剁有8籠、這馬剁無矣，這馬剁無5籠。」

蚵農王文財嘛表示，「這兩改的風颱雨水閣落濟，規个水淡化去、蚵仔死真濟，閣搪著阮潟湖這馬的，養殖基地攏淡化去、足淺的，若開大日頭、蚵仔無氣嘛會死去。」

蚵仔舊年1台斤是百五箍，若這陣是起到230至250這縫。這嘛予用蚵仔咧做生理的業者頭殼☒咧燒，因為產量無夠有人只好買進口的來塌;嘛有業者猶原堅持用在地的。像這个看起來真好食款的珠寶盒仔，用豆腐參大量的蚵仔落去做料理，猶閣這蚵仔湯，毋過欲食按呢的組合就愛閣等，因為本土產量少，有業者只好先停止賣湯。

臭豆腐店老闆娘潘宜玲講：「蚵仔的物件就是歹食貴，愈ﰴ、伊愈貴，所以這馬就算是進口，一斤嘛愛220，所以足濟業者攏哀哀叫，因為阮是用家己的，所以阮家己吸收成本。」
熱炒店老闆娘吳秋節嘛講：「你像阮咧做生理就220，人咧買、凡勢250嘛買去，這馬臺灣的蚵仔足濟越南的，攏進口的較濟 因為臺灣這馬閣風颱，臺灣的蚵仔攏予風颱拍了了去。」

針對產量當時才會恢復，農民無奈地講，遮的海岸線當咧倒勼甲真嚴重，in認為七股潟湖遮的蚵仔產業賰無十冬通做，向望政府來鬥跤手予in度過難關。