88繪本全臺巡迴 「臺南味」呈現在地文化特色

囡仔用天主堂的布景做主體，設計一齣行動劇場，咧講一段屬於In故鄉月津港的發展故事。學校老師起頭先☒囡仔做調查，才閣落去寫故事兼畫圖。為著通予囡仔認捌家鄉文化底蒂，台南市教育局佮兒童文化藝術基金會合作咧推廣，毋但干焦創作爾，嘛予☒有無仝舞台，體驗台語過音的心適。

臺南市新化區正新國小囡仔講：「阮進前出一本繪本，原本是配音華語佮英語，然後這擺就加入台語的配音。這擺配音內底，予我學著平常時袂講著的台語詞。」

臺南市新化區正新國小校長郭昇欣表示：「阮以大目降18嬈做主體，欲予囡仔重新思考這个地方的故事，嘛鼓勵逐家世界遮爾大，咱著愛改變才會有較好的願景。」

這項家鄉故事繪本計畫推捒到今第九冬，湠到臺南37个行政區、60間學校來參加，透過囡仔的角度來呈現in眼中的故鄉，攏總出版88本囡仔冊。今年in嘛到台北、高雄等所在巡迴展出，落尾站轉來到臺南市立圖書館，佇遮打造沉浸式空間，嘛共原畫攏提出來展。

臺南市副市長葉澤山講：「真濟去看展覽的人非常非常肯定，我蹛佇外縣市，蹛佇臺北、高雄、新竹(的朋友)看著攏敲電話共我講，in感覺足感動，會當共臺南的文化推捒去予各縣市熟似。」

兒童文化藝術基金會執行長盧彥芬講：「予我非常感動的就是，阮佇十月份臺南遮欲辦的時陣，嘛是人工無夠，大稻埕佮陽明扶輪社攏有18位，來幫忙這回遮的畫攏掛予好。」

展覽展到11月初4，無仝地頭攏有家己獨特的人文景觀與佮自然地景，來遮通一改看著家鄉的多元性。兒童文化藝術基金會講，按算明年會當完成一百本繪本的目標。