國家人權博物館推繪本 望民眾認捌人權議題
發布時間：
更新時間：
國家人權博物館的「人權教育繪本徵選計畫」，長期共沉重的人權議題，轉換做故事、出版做繪本，希望予閣較濟人了解人權議題。今年的徵選計畫完成16件作品，其中有5件優選，未來計畫出版做繪本。（這則新聞標題、前言、內文為臺語文。）
《給爸爸的一封信》作者何昀芳：「阮細漢時陣看爸爸，定感覺伊會有奇怪的反應，厝內人攏無法度理解，譬如講伊定感覺厝內的電話予人偷聽。」
何昀芳大漢才知影，原來爸爸捌佇白色恐怖時期參與過抗爭，少年時受政治壓迫的驚惶，到今猶是通對爸爸身上發現；何昀芳就透過國家人權博物館的計畫，共伊了解的爸爸、想欲參爸爸講的話，畫做繪本。
《給爸爸的一封信》作者何昀芳：「我感覺爸爸身上這款驚惶，實在延續傷久矣，就一直到，就算到這兩三年，嘛攏猶仝款，伊猶是毋敢用Line、毋敢用Facebook。」
國家人權博物館對2019年開始執行人權教育繪本徵選計畫，𤆬參與者透過工作坊、實地勘查不義遺址、訪問政治受難者這寡方法，協助作者以多元的角度呈現臺灣的人權故事，了後創作出繪本。
國家人權博物館館長洪世芳：「逐家開始的時陣，攏以政治人權出發，這五屆以來其實足濟議題攏慢慢擴散，譬如講有的講環境議題、有的講人類基本權利的問題，攏有。」
人權繪本計畫教師陳玉金：「像這類的議題出版機會，並商業性，教育意義較強的作品，伊出版的機會相對較少，這陣阮就真需要公部門的介入。」
今年的計畫完成16件作品，有5件作品入選優選，未來計畫出版做繪本。人權館希望透過遮的繪本，共沉重的人權議題，轉換做故事感受，予後一輩、囡仔人，自細漢建立人權的觀念。
張曼亭/編輯
