安泰病院大火9死 多數行動不便、1位是機房員工
發布時間：
更新時間：
屏東東港安泰病院，今仔（3）透早發生火災，消防局接著通知了後，隨出動46隻消防車去拍火，國軍嘛派救護車來鬥相共。著火燒的大樓內底，攏總有324个患者。這場火災造成9人死亡，目前屏東地檢署已經介入，欲來調查著火的原因。（新聞標題、導言及內文皆為臺語文）
病院內底雺煙散霧，醫護人員趕緊共病床頂的患者，捒去到外口。這是屏東東港的安泰病院，初三透早7點40外分病院2樓的配電室火燒，病院外口透風落雨，猶是通看著厚厚的火薰。
一樓大廳佮亭仔跤規个kheh甲攏是患者、家屬佮醫護，現場亂操操，有的人猶咧吊大筒、有的倒病床，有的患者猶閣坐輪椅，有患者想著逃生的時，視線看袂清、閣予煙嗾著，心內是真驚惶。
患者：「衝煙阮才知影。（記者：喔，衝煙才緊共恁疏散）」
患者：「（記者：煙會蓋大無？） 煙足大的。」
接著安泰病院火燒的消息，屏東縣消防局隨出動46台消防車前往現場，國軍嘛派出33人、10台救護車來鬥相共。著火的D棟大樓內底攏總有324个患者，醫護、警消趕緊疏開，火佇咧下晡1點外拍化，攏總造成9个人死亡，其中8个多數是行動無方便的患者，另外1个是機電房的員工。
安泰醫院榮譽院長 蘇清泉：「重症的阮咧前棟，阮遮有幾若棟會當隔離。」
屏東縣長 周春米：「因為這是病院，所以嘛啟動大量傷患處理機制，閣有高屏醫療網。」
根據屏東縣衛生局下晡5點的統計，有110个患者轉送去其他病院，其中14人蹛加護病房，12人留佇急診觀察當中。安泰病院這改的火燒事故造成9人死亡，屏東地檢署已經介入偵辦，後續嘛會入去到現場蒐證、調查火燒的原因。
記者 呂尚儒 莊浚佑 黃子杰 謝政霖 綜合報導
唐嘉良/編輯
