社區協會辦虎爺彩繪活動 陪囡仔認捌動物神

手提虎爺的模型，大人囡仔發揮創意用各種色水，咧呈現in心目中虎爺生做啥物模樣。為著通予逐家認捌虎爺信仰文化，臺南赤嵌社區發展協會頭擺以臺灣首廟天壇的虎爺公來做見本，辦工作坊請老師來講解，予鄉親那體驗彩繪那了解文化背後的內涵。

囡仔，「我有咧做模型廟會，我就感覺這活動足好，然後我就來參加，我今天仔日畫一尊虎爺，伊是柑仔色的。」

赤嵌社區發展協會理事長張耕華，「傳統文化這馬慢慢仔咧消失，阮社區就是欲做傳承的代誌，介紹予閣較濟家庭，會使閣這款傳統文化延續落去。」

虎爺閣號做下壇將軍，大多數會佇保生大帝佮土地公廟的予人服侍，其中虎爺公分做天虎佮地虎。文史工作者講，一般攏佇神明龕下面的較濟，若天虎就愛神格懸的，才通囥上神桌。民間信仰中，虎爺公是囡仔的守護神，因為參台語好額真倚音，因此嘛予人講是會帶來錢水的金財神。

仰山工坊工藝師吳明諺，「透過這較傳統的技法，來深入咱民眾的生活內底。」

文史工作者謝奇峰，「佇農業社會醫藥無發達，人攏會來拜虎爺，會用古仔紙會佇虎爺的，下頦遮共huê huê咧，相傳虎爺公會使保庇囡仔的，豬頭皮會較緊好，這馬現代的變化內底咱就會使看著，拜虎爺頭前頭前攏有一个水，廟的人攏會建議ﰀ會當小錢換大錢。」

根據中西區公所統計，區內有咧拜虎爺的廟宇有72間，攏總164尊，會當講是全國廟宇數量上濟、密度上懸的行政區。公所指出，逐尊的造型攏有無仝特色，逐家通實際行踏來欣賞。