課審會遴選學生代表 有委員話語輕視惹爭議
發布時間：
更新時間：
目前教育部佇咧8/24、25兩工，召開遴選「課程審議會」的學生代表，望有學生代表來表達意見。只要有學生身份攏會當參加，毋過進前的討論，有委員用「小屁孩」來稱呼國中小的遴選委員，今天有團體就質疑，講這款話的人敢有資格成做遴選委員，也呼籲教育部和參與者著重視兒少的表意權和主體性，予逐家攏通自由表達意見。（此則新聞標題、導言、內文皆為臺語文。）
目前教育部佇咧8/24、25兩工，召開遴選「課程審議會」的學生代表，望有學生代表來表達意見。只要有學生身份攏會當參加，毋過進前的討論，有委員用「小屁孩」來稱呼國中小的遴選委員，今天有團體就質疑，講這款話的人敢有資格成做遴選委員，也呼籲教育部和參與者著重視兒少的表意權和主體性，予逐家攏通自由表達意見。
2015年台灣捌有濟濟學生參與反烏箱課綱運動，後來學生才爭取著佇咧課程審議委員會（課審會）有學生代表通參與討論。所以佇課審會進前愛先開遴選委員會來選出學生代表，只要有學生身份攏會當參加。煞有遴選委員指出，佇咧24、25日的遴選會議，有委員出現情緒管理的問題，閣欺負參加會議的國中小學生。
反課綱世代運動參與者/遴選委員 劉千萍表示：「彼工現場就是有委員咧討論議事的過程中，情緒愈來愈激動，甚至出現言論攻擊抑是質疑為啥物有國小國中生委員咧現場的狀況，可能用詞幼體化，抑是言行的壓迫。」
針對遮的亂象，有遴選委員和當年反課綱運動的參與者發起連署，呼籲教育部和遴選委員愛重視這屆會議的各種亂象，嘛認為年紀佮專業度無關係，無應當用這來質疑年紀細的學生敢有資格做遴選委員。
反課綱世代運動參與者/遴選委員 劉千萍講：「遴選會現場其實一直有一个真重要的精神，就是愛尊重學生的主體性，然後每一个學生，無論是啥物年歲，逐家攏是平等的遴選委員，無應該袂記得伊按怎去促成學生參與、包容學生無仝意見的重要精神。」
劉千萍指出，這屆比往過加出較濟年紀細的學生，怹呼籲教育部著保障兒少的表意權和主體性。另外教育部是回應講，經過調查，會議現場無聽著言論譬相幼體化的代誌，但是會後蓋成是有參與者佇網路頂抑是私底下有一寡言論的攻擊。教育部呼籲委員之間應該互相尊重。
記者 呂尚儒 莊浚佑 臺北報導
盧元媜/編輯
