麟洋金牌連霸 文化奧運臺灣館全場唱國旗歌
發布時間：
更新時間：
昨昏咱的羽毛球男子雙打提著金牌，佇巴黎文化奧運台灣館，金曲歌王謝銘祐帶動現場的民眾，做伙唱國旗歌。為著欲共台灣選手奧援，佇巴黎嘛用上有台灣味的台灣民謠和電音來鬥鬧熱，謝銘祐表示，為著欲唌外國朋友聽台語歌，咧編曲的時攏有加入濟濟歐美的元素入來，予怹聽著有趣味。（此則新聞標題、導言、內文皆為臺語文。）
歌手謝銘祐：「同心同德，貫徹始終，青天白日滿地紅。金牌爽啦！」
金曲歌王謝銘祐和麵包車樂團，8/4tshuā文化奧運臺灣館的民眾，做伙唱國旗歌，慶祝臺灣羽毛球雙打提金牌。佇現場謝銘祐除了演唱家己創作的歌，嘛唱濟濟臺灣民謠。謝銘祐表示，為著欲吸引外國朋友來聽台語歌，音樂旋律攏有特別改編。伊講，「利用in熟的節奏，來吸引in聽台語歌，我認為in會感覺有趣味是，這个音樂型態in攏熟，但是一下唱台語，伊若像變另外一首歌仝款。」
除了台語歌，臺灣館佇「島嶼風華」主題內底，原仔有無仝族群元素的音樂，阿美族的DJ汝妮，就選郭英男唱的「老人飲酒歌」來開場。汝妮分享講，伊的名佇怹的神話內底是創造大地的女神，伊希望透過電音混合原住民音樂，用這款創新的方式來予世界聽著臺灣的聲音。汝妮講，「我就感覺講我做這个音樂，就若像我的名仝款，我共阮的傳統音樂孵做足新的方式，去呈現阮傳統音樂的文化。」
毋但聽音樂，表演團隊佇現場，嘛帶動民眾做伙跳舞。為著欲呈現臺灣獨有的特色，咱的文化國家隊逐日攏有無仝的精采表現。
曹詠涵/編輯
