明華園結合元宇宙 戲迷佇虛擬空間看歌仔戲
發布時間：
更新時間：
歌仔戲這款傳統戲曲，也當咧綴時代行，用多元方式展現傳統文化。明華園戲劇總團共出名演員孫翠鳳的歌仔戲身段，攏完整掠入去電腦內底，結合元宇宙的概念，予觀眾通佇虛擬空間欣賞歌仔戲齣，有無仝款的看戲體驗；另外，明華園也咧規畫，共元宇宙佮歌仔戲教學結做伙，透過科技的力量，來鬥傳承歌仔戲文化。（這則新聞標題、導言、內文皆為臺語文。）
操控虛擬世界內底的人物，就通踅這个元宇宙內底，紹介明華園戲劇總團的博物館。
明華園閣參流行歌手、樂團合作，共經典戲齣「韓湘子」、「冥戰錄」編做全新歌曲，結合元宇宙影像，予觀眾新的看戲經驗。
明華園戲劇總團 孫翠鳳：「每一年明華園總團攏咧思考，我今年出來的新戲，我到底欲按怎佮現代的觀眾做結合、做交流。」
樂團「美秀集團」團員 冠佑：「北歐in有用歌劇，加上搖滾樂的做法，融合出真現代的、新的音樂模式；歌仔戲咧，歌仔戲是臺灣的歌劇。」
孫翠鳳講，歌仔戲自古以來，就是一直隨時代進步、綴咧改變的傳統戲曲，每一年攏愛變出新的齣頭。親像這擺為著創作元宇宙內底的虛擬角色，明華園表示除了開大錢，也真考驗演員耐心。
明華園戲劇總團執行長 陳昭賢：「辛苦的所在是，孫老師愛仝一个動作，真正是做N遍──我有幫伊統計，上無一个動作，做42擺。」
孫翠鳳為著予電腦掠出上完整的動作，每一个動作攏愛斟酌做真濟擺，才通完成。明華園表示，這馬電腦內底已經有孫翠鳳的虛擬角色，紲落來規畫用這个虛擬角色，融入歌仔戲教學課程，予歌仔戲的傳承，通更加多元、更加利便。
記者 郭柏均 林郁凱 台北報導
唐嘉良/編輯
