婦人人雄雄送柑仔硩紅包 講欲予店員買藥仔食

路口電眼翕著，20下晡一位查某人騎機車，送一袋物件到苓雅區一間飲料店，內底毋但有六粒的柑仔，閣有幾若張一千箍新台票，店員拒絕了後，婦人人閣講，錢是欲予店員買藥仔食的，落尾店員是共這段故事po 佇網路，引起袂少討論，店家表示講，毋捌看過這位婦人人，in也已經隨報案。

店家，「阮已經提去予警察，予警察處理矣著。」

高雄市警察局苓雅分局民權路派出所所長 鄭慶璋，「有婦人人捾著六粒柑仔，去ﰀ的店家，講遮的柑仔欲予ﰀ食，這一袋內底六粒柑仔，佮一萬兩千箍的新臺票，捾來向派出所報案。」

婦人人按呢的行為，毋但店員困擾，有人驚講這是詐騙，有濟濟網友認為，這敢會是民間信仰的過運，欲共歹運過去別人身上。高雄意誠堂的主委表示講，若欲過歹運，就愛做功德，親像這種送人物件佮錢就欲過歹運的行為，毋管是佛教抑是道教，攏無按呢的作法。

民眾，「有看著，干焦是講轉歹運。」

民眾，「若是收著會掠準講伊欲詐騙，感覺足恐怖的。」

高雄市意誠堂主委洪榮豊，「若是會使共歹運來予你，那按呢逐家來做歹就好，做歹了後，共歹運予你，我永遠嘛好運，是無可能的代誌，各人造業各人擔。」

苓雅分局表示講，目前已經查出婦人人的身分，後續會請伊到警察局說明，順紲共錢領轉去，呼籲民眾若是拄著這種狀況，就愛先報警。