COP29會前會 臺灣民團用台語報告環境議題

聯合國氣候變化大會COP29，今年11月欲佇亞塞拜然舉辦，這是一个討論氣候變遷議題的上重要的全球論壇。佇正式會議進前，自6/3開始有先咧德國波恩召開SB60會前會。臺灣有學者、NGO、媒體等等，以民間團體的身份，組成「亞太永續行動學院」(Asia SDG Action Campaign)去參加，甚至以台語上台發表報告。

亞太永續行動學院成員 林英杰(2024.06.06)，「我是林英杰我來自臺灣，真希望臺灣有一工，會當成做咱世界的公民。」

民團佇6/6以台語發表的主題，是「Formosa的語言佮永續發展」，這也是歷來頭一改有人用台語咧聯合國的正式場合演說。推動台語發表的林英杰表示，這是伊一直以來想欲做的代誌，真歡喜會當予台語佇國際發聲。

亞太永續行動學院成員林英杰，「大概以我看大概有197个組織，差不多6700外人來自世界各地的朋友，差不多一百外个國家來應該是有的，波恩這个氣候大會，嘛是咱的每一改COP，可能前置的工課佮決議，攏會佇遮先演練抑是討論。」

民團表示這改ﰀ佇會前，有向主辦方要求以咱的本土語言發表，也得著同意，毋過時間傷逼主辦方袂赴倩翻譯，抑若民團是講因為雄雄聽著生份的語言，一寡外國人煞顛倒對台灣愈有興趣，會後嘛有真熱情的交流。

亞洲永續行動學院成員陳維鈞，「毋過當阮用台語講的時陣，ﰀ顛倒感覺誠特別，所以ﰀ會開始看阮的簡報，甚至ﰀ的手機仔，對阮的螢幕面頂的英文去做翻譯，ﰀ希望知影講，咱台灣人用台語講遮的內容，是欲講啥物貨。」

民團指出尊重無仝的社會文化減少無平等的對待，這嘛是永續發展目標當中真重要的一項。ﰀ嘛真感謝主辦方實踐永續發展目標的理念，予ﰀ用台灣話，來講台灣民間咧SDG佮ESG的拍拚和貢獻。