有民眾牽狗的索仔卡佇石頭 敲予119討救兵
發布時間：
更新時間：
高雄頂個月有人為著牽狗的索仔，卡佇石頭縫，敲119。舊年高雄市有3千外件，是叫消防隊去替民眾做一寡無要無緊的代誌，啥物披衫、炒飯等等。民代認為，明明就有消防法通好罰，毋過這兩冬，煞針對烏白報案的攏無處罰，要求市政府愛強制執行。(這條新聞導言、標題、內文是台語文。)
來到消防勤務中心，電話一直敲入來，消防人員逐工處理民眾報案，毋過頂個月高雄有民眾報案講，有人牢佇石頭，救護車到現場才發現是卡牢的是牽寵物的索仔，就有議員批評講，根據消防法36條規定，若是民眾烏白報案，是會當罰錢，毋過這兩冬以來攏無人予處罰，認為市府愛嚴格執行。
高雄市議員 許采蓁：「因為有一寡民眾，請阮的消防兄弟，毋管是替ﰀ曝衫抑是炒飯。」
高雄市消防局舊年有12萬件消防救護案件，其中較無緊急的第四佮第五級的有八千外件，面對議員質疑，消防局表示講，有袂少人是報案時陣傷過緊張，若是民眾毋是刁工的，基本上攏袂開單，干焦110年有罰過一件。
高雄市政府消防局救災救護中心主任 郭士銘：「有一位姓李的查埔人，上少敲15通119電話，消防人員到現場了後，然後伊表示伊無敲119電話，抑是無需要送病院，根據消防法第36條來處罰。」
根據消防局統計，救護車予民眾亂使用，上濟就是共救護車當做計程車，第二就是啉酒醉的民眾烏白敲，第三是指定送到較遠的病院。
高雄市政府消防局緊急救護科科長 黃士純：「收費的情形，上濟的狀況就是講，民眾共咱救護車因為免費，共伊當作是一个免費的交通車。」
高雄市有訂定消防救護車收費辦法，若有評估無緊急、亂使用，會罰一千七百箍，消防局表示講，收費是希望民眾毋通烏白用，未來會針對亂使用的人加強處罰。
陳稷安/編輯
