蘇花下清水路段崩去 佇舊路設便道4/6開放

樹仔、車路，因為地動崩山，滿四界攏沙塗，不時閣有石頭繼續對山壁落落來，這是蘇花公路的崇德管制站路段，為著拚通車已經出動怪手趕緊整理。蘇花公路影響嚴重的路段，閣有規个地基攏崩落的下清水橋，搶救難度懸；下晡行政院副院長鄭文燦、交通部長王國材到崇德路段視察，講下清水橋會先加強以前的舊橋，先予細隻車通行。

行政院副院長 鄭文燦，「上重要是台九線蘇花公路，下清水橋的斷橋，斷橋這段是無替代道路的，所以一定是愛搶通，才通對花蓮往宜蘭行，四月初六下晡六點以前，先完成臨時便道，這个臨時便道通予小型車通過，大概四米闊左右。」

臺語台記者郭柏均，「蘇花公路崇德管制站附近，是坱埃坱甲滿四界，現場嘛會使看著，工作人員當咧清理道路，希望會使趕緊通車，行到邊仔的崇德火車頭，這个火車頭因為月台損害，已經無法度予旅客使用，目前只有載貨的火車，會使佇遮停靠。」

月台THÀI-LÙ落落，柱仔也有必巡，崇德火車頭雖講鐵路無因為地動損害，但是月台就無樂觀。載客火車袂使佇遮上落旅客，修復的時間，目前也捎無摠。

臺鐵公司董事長杜微，「崇德站，因為伊較倚咱這擺落石區，所以伊有結構的疑慮，為著安全第一，所以咱崇德站暫時無辦理載客。」

花蓮大地動，共部份東部地區對外道路攏搖斷，經過搶救，台鐵表示，拜四鐵路全線已經正常，賰崇德車頭愛等結構鑑定，才決定後一步。蘇花公路上尾的搶救路段、下清水橋，按算拜六6點通予細隻車行，五月底開放大隻車行，年底才通完成重建；鄭文燦表示，大隻車這陣愛先以台八線接中橫、抑是行南迴公路，做替代方案。