高雄前金國小奏民謠 提著布拉格音樂節金牌

台頂演奏的桃花過渡，是臺灣早期人人知的車鼓民謠，紲落來閣有天烏烏、思想起，前金國小的學生囡仔用這三條民謠，予布拉格青年波希米亞音樂節，充滿臺灣味，前金國小的管樂團，開半年時間準備，將三條臺灣民謠編入去35分鐘的組曲，尾仔IN提著上懸的榮譽金牌獎。

高雄市前金國小學生呂承駿表示：「一開始看著日本的阿兄佮阿姊足驚的，最後是老師的加油予我克服的。」

高雄市前金國小學生柯琦安表示：「遊行的時陣有看著來自日本的學生，然後交換國旗。」

布拉格青年波希米亞音樂節已經辦19年矣，今年有臺灣、美國、日本14个國家，19个音樂團隊參加比賽，這擺前金國小攏總派出43位學生出國交流，in閣特別佇音樂遊行的時陣，佇廣場擛國旗、大聲唱國歌，現場也有臺灣人來替in拍噗仔加油，予世界看著臺灣。

高雄市前金國小管樂團指揮張詠佑表示：「特別揀三條，咱代表咱臺灣的臺灣民謠，予逐家予世界會當熟似臺灣。」

家長林雅萍表示：「就阮演奏國歌佮擛國旗，彼種感動是這世人可能干焦有這擺機會，有法度去體驗。」

前金國小老師表示，這改比賽，臺灣隊是平均年歲上細漢的，這陣學生囡仔會當克服時差、氣溫，甚至袂驚其他國家隊，順利提著金牌獎，實在真無簡單。