本土語言終身貢獻獎 頒予為拍拚的周清玉、楊麗花

一生為台語拍拚的周清玉女士，猶閣有共一世人奉獻予歌仔戲的楊麗花女士，佇咧世界母語日，上台領本土語言終身奉獻獎。其中前彰化縣長周清玉，30年來注心推廣台語和栽培人才，閣佇2018年創立全國第一个台語文創意園區，伊嘛呼籲國家的語言政策，袂當干焦注重中文、英語，一定愛完整包括各族群的母語。

本土語言終身奉獻獎著獎者周清玉，「就是本國國家語言發展中心，一定要趕緊來設立，這个緊設立了，才有可能全部融合逐方面，逐種語言攏來做伙來推動。」

另外，歌仔戲界一粒一的傳奇小生楊麗花，是台灣人的共同記憶。楊麗花表示，台語是從出世講到今的語言，伊希望歌仔戲會當繼續傳承台語，用台語來傳達祖先的智慧、和台灣文化。

本土語言終身奉獻獎著獎者楊麗花，「我是台灣囡仔出世的，攏講台語，演台灣文化的歌仔戲，這是我應該做的職務，但是遮爾媠的文化，咱應該是台灣人應該愛來保護的責任，逐家應該做陣來看歌仔戲學台語，予咱台灣的文化傳萬年，多謝。」

另外本土語言傑出貢獻獎，猶閣有7个個人獎和3組團體獎，台語、客語和原住民語的代表攏有。教育部長潘文忠表示，希望透過頒獎予愈濟人認捌為母語貢獻的人。

教育部長潘文忠，「我相信在座所有得獎的團體佮個人，彼是攏用一世人的性命，對這个工課一直來努力、來奉獻，就是感覺看著這个語言就欲消失去矣，若無用力我想後一代，根本就毋知影咱欲看的欲聽的遮的語言。」

自111學年度開始本土語課程佇國中、高中變做必修課，潘文忠表示這是透過濟濟前輩的拍拚，拚20幾冬才總算實現，伊希望繼續推動母語成做少年家日常的語言，予母語傳承落去。