「尋找湯德章」紀錄片 𤆬民眾認捌臺灣的歷史

《尋找湯德章》紀錄片：「臺南市差不多95%，講湯德章生做按怎，無人講會出來。」

來到臺南市中心的圓環，遮就是湯德章紀念公園，二二八的時伊就是佇遮予國民政府銃決。臺南閣有一條湯德章大道、嘛為伊設紀念日、起過紀念館，毋過濟濟臺南人煞講袂出伊的故事，這嘛予拍過「灣生回家」的導演黃銘正開始好奇湯德章是啥物款的人。

導演黃銘正，「為啥物遮爾近的生活內中的歷史，結果佮咱遮近煞感覺非常遙遠，這是到底是為啥物，為啥物咱無法度讀咱家己土地的故事，所以我感覺講咧咱家己的所在，袂記得家己土地的故事，彼是一種悲哀。」

湯德章1907年佇臺南出世，爸爸是日本人、媽媽是臺灣人，捌做過警察和律師，因為做事公正受著濟濟人尊重，二二八的時，伊參與維護臺南的治安，尾手煞予政府以叛亂罪共銃決。共同導演連楨惠表示，親身接觸過湯德章的人已經愈來愈少，這是一場和時間走相逐的比賽，嘛總算有機會揣著伊的契囝湯聰模，接觸兩年了後伊才慢慢仔講出家己和老爸的故事。

《尋找湯德章》共同導演 連楨惠，「你知影彼个驚惶伊擔70外年，伊毋敢共伊的後生，伊的查某囝講為啥物，其實這攏是為著保護ﰀ，經過按呢五年ﰀ的家屬無熟似(湯德章)，也透過佮阮做伙去揣。」

目前「尋找湯德章」拍算會佇3/15正式推出，團隊嘛拜訪濟濟研究過湯德章的民眾，閣去到日本揣伊的親情，透過無仝的角度呈現湯德章的故事，較可惜的是湯聰模先生佇舊年辭世，食到91歲，無法度親身看著紀錄片，導演向望這支透過紀錄片予愈濟人做伙來了解台灣的歷史。