臺南「五福商店」修好勢 百年徛面、簾簷閣見光

建築的徛面，有西洋歷史的物件來妝娗，嘛有本土的元素，這棟建築物混合式風格唌人注目。佇臺南中正路的五福商店，是1914年楊添賜創立的，落尾佇1928年徙來中正路遮，厝主後代為著保留老厝原本的模樣，向文化部佮市府申請補助計畫。修復團隊用四冬的時間，對歷史調查、設計先做起，一步一步共老厝活化，重現百年建築的風華。

好舊好輔導團隊經理洪嘉呈，「遮其實比林百貨佮邊仔的，末廣町店舖住宅閣較早，所以彼个時陣有一寡代表性，就是包括伊是這條路上早 上媠的一間厝，徛面的物件攏較特別。」

府丞建築顧問公司營運經理莊秉翰，「這間厝足大間，過伊足濟細節部分，二樓的hi-sa-sih的部份，古早的相片，攏當看著ﰀ兜若欲嫁娶，就是翁仔某欲翕相，就會佇hi-sa-sih遐翕相。」

老厝內底無論是屋架、hi-sa-sih、佮六角磚仔等物件的修復，每一項細節IN攏做甲真幼路，像五福商店仝款有特色的老厝，根據文化局統計臺南有2463棟，市府計畫未來欲捒全國首創的老厝信託政策，in向望透過這个平台，來整合資源佮提供老厝專業的規劃，嘛創造老厝的上大效益。

臺南市文化局文化建設科科長梁晉榮，「予遮的臺南人才佮舊厝，閣有上重要的資金，會當佇這个平台頂懸互相來利用，透過按呢的運作希望會使來設立，臺南文化首都的懸度。」

真濟人關心五福商店到底當時會對外公開，負責的團隊講，目前閣咧揣人進駐，內底有濟濟空間通使用，in拍算欲共咧建築的原件佮厝主家祖留落來的物品，攏提出來展示，予眾人一改看予夠氣。