全國語文競賽 新北明志國中讀者劇場著特優

「大自然展現嬌媚，予咱欣賞青春好芳味，芳啊」

新北市明志國中的學生，手提文本用紲拍閣活潑的臺語，呈現「讀者劇場」。「讀者劇場」是教育部自2022年開始試辦的比賽項目，因為往過全國語文競賽口說項目，總是受外界批評講和日常對話差相濟，所以增加「讀者劇場」來鼓勵本土語行向生活化。明志國中今年毋但指導老師提著臺語的朗讀特優，學生佇臺語「朗讀」和「讀者劇場」嘛攏提著特優。

明志國中學生蔡妙善指出，「因為朗讀，伊是一个人的比賽，猶毋過阮的讀者劇場，是足濟人欲去比賽，逐家攏愛足配合的，按呢阮才會得著好的成績。」

明志國中學生陳柏融講，「若是我無佮阮阿媽蹛，我可能就袂曉講臺語，阮兜講的方法可能無遐爾仔標準，就是咬字，因為我訓練朗讀，芳宴老師教我足濟較正確的，咬字的方式。」

怹的指導老師李芳宴，今年頭改參加全國賽，就提著臺語朗讀特優。伊本身是音樂老師，因為對臺語真有興趣，想欲共臺語教予下一代，就時常共臺語結合佇教學內底，自2011年開始指導學生參加語文競賽到今。

明志國中老師李芳宴表示，「我想欲佈置一个臺語的環境，予學生講臺語袂歹勢，我感覺只要咱開喙講臺語，臺語就會抾轉來。」

明志國中校長楊明源講，「有的序大可能攏佮囡仔講華語，所以咱嘛是咧學校教育，予伊知影咱本土的臺語的重要性。」

今年全國賽計共有2,443位選手參加，競爭誠激烈，其中新北市代表隊總共提著95座特優，占全國上濟。明志國中佇口說項目表現上出擢，拜二為著欲表揚老師、學生，學校特別辦慶功宴，嘛鼓勵學生佇本土語的學習繼續拍拚。