藝師陳志良、蘇榮仁 新登錄高市無形文資保存者

全台上大尊的糊紙大士爺，今年普渡坐鎮佇小港龍湖廟，時間到，就將大士爺燒掉，這項傳統糊紙技術，煞漸漸失傳，做糊紙工藝的老師陳志良，是傳承家族事業，伊是第四代，目前嘛傳予in囝，老師製作的紙物造形誠生動，幼路頂真，今年陳志良老師嘛予人登錄做高雄市無形文化資產保存者，特別的是糊紙是高雄市新登錄的傳統工藝項目。

糊紙保存藝師陳志良講，「喪葬禮儀內底攏有，所以講變成欲燒物件，著無所在會當燒，無所在會當燒的當中，就會變成夕陽產業。」

積極保存傳統彩繪的蘇榮仁老師，仝款才登錄做無形文化資產保存者，伊自細漢對畫圖有興趣，投入廟宇佮王船彩繪已經有40幾冬，老師捌真濟手路，毋過王船彩繪工課無固定，老師的專業抑是以廟宇彩繪為主。

傳統彩繪保存藝師蘇榮仁強調，「久久才做一擺王船，三年五年無一定，當然市場當中，阮攏佇寺廟彩繪為主軸佔大部分。」

目前這兩位老師的作品，攏佇高雄市立歷史博物館一樓展出，毋管是糊紙抑是傳統彩繪，雖然這馬學的少年人無濟，毋過兩位老師抑是積極投入傳承教學，向望傳統工藝會當繼續保存。