政大書城決定繼續營運 臺南文化局：買冊支持
發布時間：
更新時間：
政大冊城進前傳出花蓮、台南店8月底欲停業的消息，引起各界討論。這馬政大冊城最新公告講欲繼續營運落去。毋過實體冊店面對網路的衝擊，政大冊城的創辦人李銘輝表示冊店未來愛轉型，台南市文化局表示會共冊店買新冊、推廣閱讀來支持實體冊店。（此則新聞標題、導言、內文皆為臺語文。）
徛佇冊櫃頭前掀家己興趣的冊，原本政大冊城台南佮花蓮店，傳出月底欲關起來，各界攏真關心，嘛予in真濟鼓勵，這馬冊店決定欲繼續經營落去，嘛推出全館73折的優惠予人客。政大冊城的創辦人李銘輝表示，冊店多元經營是未來的趨勢，嘛一定愛轉型。若繼續惡化落去攏無改善，伊估計全台冊店會關到賰250間。
政大書城董事長李銘輝表示，「就是愛搝近人佮人之間的距離，閣較捷辦一寡作者抑是議題性的對談，就是作者佮讀者之間應該愛有心靈上的溝通。」
民眾：「希望伊繼續佇咧伊其實，毋敢若是買冊的商業行為，閣會使提供這个城市的風景。
民眾：「上主要嘛是愛營造臺南市民的閱讀環境」
面對數位時代，實體冊店足歹做生利，臺南市文化局嘛用行動支持業者，往過圖書館若欲買大量的新冊，就愛公開招標委託代理商來訂冊，來來回回愛兩個月，這個月開始，文化局共無仝的實體冊店買一寡冊幫助in維持落去。另外嘛會安排各領域的頭人，tshuā民眾踅冊店買冊。
臺南市文化局長謝仕淵：「一方面予冊的主題清楚，嘛有推捒閱讀的效果，另一方面阮嘛加速買新冊的速度，會使實際挹注冊店營收佮經營。
目前臺南實體冊店有52間，文化局指出，冊店是城市重要的文化空間佮人文場所，in計畫未來會以閱讀推廣佮活動，參冊店合作。
洪家馨/編輯
