母語營隊包火車 唱臺語囡仔歌、講解鐵路智識

火車頂懸，老師tshua7囡仔那唱台語歌謠，那比動作，看起來是真古錐。這个營隊的活動包規台區間車，而且閣用本土語言做主題。

社團法人台灣台語路協會故事講師王盈蓉表示：「這个活動用足趣味的方式來接觸台語，尤其第一節車廂，伊的設定是全台語的，所以我嘛希望佇活動內底，阮會用全台語，雖然講大部份的囡仔，其實是無啥聽有，毋過因為阮有佮圖，閣有教動作，聽無的囡仔，綴咧聽綴咧唱，會是足趣味的。」

來參加的家長和囡仔表示，這个活動真趣味，通那學台語那耍。

參加民眾表示：「唱歌上趣味，唱丟丟銅仔，會當出來耍真好，禮拜日佮囡仔出來耍，閣會當練台語，感覺這个活動誠好。」

主辦單位表示，這改的活動，每一个車廂就像一間教室，替無仝年歲設計無仝的課程。

國家鐵道博物館籌備處展覽教育及公共服務組組長林慧芬表示：「希望逐家會當透過這个過程，來加熟似咱的鐵道的智識佮文化，因為咱這馬足濟民眾蹛佇都市，毋捌坐過火車，所以阮希望利用這斗的機會，歡迎逐家來和火車較親近。」

這馬歇熱，會有濟濟單位舉辦活動，透過坐火車，來認捌閣較濟火車的台語詞，對參加的民眾來講，是一个全新的體驗。