安南果菜市場 人客加2成、菜價也起2成左右

風颱欲來啊！真濟民眾一透早就去果菜市場買菜做準備，邊仔的頭家嘛真無閒咧整理菜，手攏無停過。因為風颱的關係，菜價綴咧受影響。民眾表示，高麗菜、刺瓜仔黑白買五項就愛三百摳。實際踅市場一輾，民眾攏感覺葉仔菜類有明顯的變貴。攤販表示，菜價整個起兩成左右。

一名民眾表示：我昨昏就有來買，今仔閣來買高麗菜，感覺風颱猶未來 就咧起價矣。
也有民眾﹔(價數)攏會起價。嘛是接受起價啊無欲按怎，愛買就是愛買

臺南市安南區果菜市場攤販蔡先生﹔幾乎逐項攏有起，是葉菜類起較懸小可仔，就風若沃落來、擉著爛去bái去，葉菜類較無袂堪得雨。

青菜價格到底起偌懸，高山高麗菜原本一斤賣25摳，這馬起到48摳，干單半粒著愛百一才買會著。若萵仔菜原本一斤賣30摳，嘛起到60摳。攤販講，若大雨來，種佇外口的菜蔬無一項閃會過，影響菜價的關鍵，主要愛看菜量的濟少。除了菜蔬，雜貨銷路嘛蓋好。

臺南市安南區果菜市場雜貨攤販﹔買菜的人較濟，阮這麵嘛算是主食，所以嘛是有增加買的量，大概應該上少加兩成有。

民眾驚風颱來風雨大，趕緊先共買物件買起來囥，來市場人嘛並平常時增加兩成。攤販表示，民眾若欲等菜價穩定，就愛閣看這站仔的天氣變化。