華南雲雨東徙各地落雨 全臺水庫拚人工催雨
郭柏均 張育睿 / 台北報導
發布時間：
更新時間：
目次
受著東北季風和華南雲雨區的影響，各地頭對昨昏(3/25)開始變天總算有明顯的雨量，水利署嘛有趁這个機會催雨。而且今仔(3/26)早起7點外，玉山總算落雪矣，這是自從1953年設站以來，玉山寒人上慢落雪的紀錄。毋過明仔載開始，水氣就會閣減少，南部的水情恐驚猶原真絚篤。(本則標題、導言、內文皆為臺語文)
玉山的山坪白鑠鑠，氣象局表示，玉山早起6點40分開始落冰珠，7點5分開始落初雪，一直落到7點15分為止；這是對1953年到今，上晏落雪的紀錄。
中央氣象局預報員 張承傳表示：「今仔日(3/26)佇玉山，猶是有機會一陣一陣出現落雪，毋過明仔載(3/27)的話，機會上因為水氣會慢慢，中南部的水氣會慢慢較少，所以明仔載落雪的機會，佮今仔日相比並會較低一寡」
受著華南雲雨區東徙的影響，26各地頭攏落雨，針對台中、南投、嘉義、佮花蓮的山區，氣象局閣發布大雨特報。水利署也趁機會，佇各地水庫施行人工增雨；毋過這兩工的雨水，大部份落佇中部以北的地區，真僫解救南部的水情，而且27開始雨水就會減少。
中央氣象局預報員 張承傳表示：「對水情加減有一寡幫助，毋過袂完全解決，可能猶是愛加幾波春雨，中南部地區明仔載(3/27)的雨，會較偏向山區為主，拜二拜三除了北部東半部，猶是有一寡落雨的狀況，中南部的落雨會偏向山區，較零星、較局部一寡」
氣象局表示，拜四開始，有後一波華南雲雨區東徙，北部、東半部、中部攏較會落雨，到拜五就會賰東半部佮北部山區有雨。另外受著東北季風的影響，到拜二進前北部、東北部氣溫上低15度，拜三開始東北季風減弱，會沓沓回溫。
鄭雅存/編輯
專題｜改造地獄路 台灣行人路為何難行？
