嘉義古蹟北門站動工修復 林鐵3/20起袂靠站
林緯廷 /嘉義報導
發布時間：
更新時間：
目次
阿里山鐵路的北門車頭，進前有發現去予蟲蛀去，阿里山林鐵佮文化資產管理處，對3月20開始施工了後的拜六、禮拜，嘉義到北門的松梧列車，會改對嘉義車庫園區的月台上車。（這條新聞標題、前言是臺語文。）
厝頂崁帆布用索仔共綁咧，壁堵嘛有看著蟲蛀，這間檢車室佮邊仔的北門車站，3月20開始，準備欲來整修。
阿里山林鐵及文資產管理處秘書 林其德：「阮目前有發見，北門車站部份梁柱去予蟲蛀，門窗、厝瓦、雨淋枋閣有油漆，攏有必開壞去的情形。」
這改阿里山林鐵文資處編2千7百萬的預算，欲來全面整修。文資處按算四百外工的工期，北門車站暫停上車佮落車，欲去阿里山的遊客，攏愛對嘉義車站坐車。
阿里山林鐵及文資產管理處秘書 林其德：「長途正班車對嘉義發車了後，後一站停車的車站，就是鹿麻產(鹿滿)車站，但是對拜六、禮拜的區間車，就是嘉義到北門的區間車來講，阮會共停車的所在改佇嘉義車站佮車庫園區內底。」
文化部佇2019年將北門車站登錄做阿里山林業佮林業鐵路重要的文化景觀，24冬前對九二一地動修復到今，就無閣整修過，希望透過這次的機會來整理，未來配合新北門車站的啟用，替阿里山林鐵觀光帶來閣較好的服務品質。
呂尚儒/編輯
2022杭州亞運 台灣百金之路
