臺灣同性婚姻佇2019年合法化，干焦限定雙方攏是臺灣人，或者是對方的國家，也有承認同性婚姻才會當結婚。落尾佇過年進前，行政院透過函釋開放，就算外國情伴的國家，無同性婚姻，佇台灣猶是會當登記結婚。毋過這項行政配套無包含中國人。
滿面歡喜共結婚證書展出來，這對台灣佮馬來西亞的同性伴侶、斯翔佮小昕，交往9冬，總算會使佇台灣登記結婚。另外一對台馬同性伴侶漢克佮喬納森交往6年，也佇仝一工登記。
台馬同性婚姻當事人強納森表示：「同婚專法通過的時，阮真歡喜也真無奈，因為阮是跨國伴侶，所以無法度結婚。」
台馬同性婚姻當事人張斯翔表示：「不管是行政訴願，抑是甚至愛行到訴訟，主要阮想欲做的，是予社會大眾 予司法機構，予行政體系看著阮是活的人，毋是干焦是748專法排除的數據。」
2019年同性婚姻開放，但是跨國同性婚姻，煞有限制規定雙方國家攏愛承認同性婚姻、才會使得，落尾佇新正進前，行政院總算透過函釋解決這个問題。這兩對有情人也共舊年的行政訴訟撤回，佇信義戶政事務所登記結婚。
台灣伴侶權益推動聯盟律師團召集人許秀雯表示：「同性專法上路的第一時間，就代理四對跨國同志伴侶，拍訴願、訴訟攏勝訴。」
但是目前猶有18个國家的同性婚姻愛經過面談程序，行政配套猶咧規畫。閣有台灣佮中國的同性婚姻，目前也是無開放。
台灣伴侶權益推動聯盟律師團召集人許秀雯表示：「陸委會一个理由是國安，另一个理由是認為，佮現此時異性兩岸婚姻程序相比並，驚會失公平。」
伴侶盟表示，這陣有百外對台灣中國同性伴侶，當咧等待登記結婚，佇跨國伴侶當中占比上懸。呼籲新內閣趕緊提出解決的方法。
