得著金馬終身成就 賴成英捐文物.助電影修復
林思皓 謝季潾 / 臺北新北報導
發布時間：
更新時間：
目次
今年金馬獎的終身成就獎頒予兩位攝影師，一位是長期翕紀錄片的張照堂，一位是今年已經92歲、拍電影的賴成英。賴成英拍過60幾支片，是導演-李行長期合作的攝影師，捌著過三座金馬攝影獎。這馬退休了後，共伊的文物攏捐予國家影視廳中心，嘛會去協助電影修復的工課。
佇狹櫼櫼的房間內底，解說色調的差別，提供意見予電影修復師。今年得著金馬終身成就獎的攝影師賴成英，已經九十二歲矣，過去捌著過三座金馬攝影獎，其中一支著獎的電影，就是1972年的秋決。
資深攝影師 賴成英講：「規个秋決，故事講起來愛有彼款足烏陰的氣氛，所以雪景內底看起來是咧落雪，但是落雪袂有彼款非常光的感覺，這是規支片愛控制佇這款敢若烏陰的情形」
賴成英勻勻仔說明伊按怎調整光圈翕出背景淡薄仔霧霧的感覺。這台攝影機是伊的寶貝，翕過四十幾支片，包括十六支伊家己導演的電影。伊嘛共咱分享，伊咧翕《我是一片雲》的時陣，按怎製作出這馬講的「特效」。
賴成英講：「佇某一角欲造成光線一種柔和的效果，就是用凡士林佇遮糊糊咧」
笑講過去，遮的片攏四、五十年以上矣，毋過到今真濟鋩角，賴成英猶是記牢牢，所以見擺國家影視聽中心邀請伊來看電影數位化佮修復的結果，攏會聽著一寡仔文獻頂懸無寫的代誌。
國家影視聽中心膠卷修復組長 蔡孟均表示：「進前有請賴桑看過一支片，彼支片是伊導演的最後一支片，叫人頭蛇。然後伊共我講遐的攏是香港片商家己加入去，家己後來閣翕的，閣加入去的片段，遐的攏毋是伊的作品」
退休咧欲三十年，賴成英真歡喜這改金馬獎閣共伊會記得，前幾年伊嘛共伊的文物攏捐予國家影視聽中心收藏。
賴成英表示：「伊遐會當有這个場所，慢慢伊會用佇陳列歷史，這電影的過程，遮的器材來展示，嘛是誠有價值佮意義」
訪問的時，金馬頒獎典禮賰個外月。賴成英講感言猶未想好勢，因為七十幾冬的電影人生，講來欲感謝的人佮事是躼躼長。
專題｜改造地獄路 台灣行人路為何難行？
