傳藝中心辦新秀表演 予少年輩傳承演藝功夫

台頂少年輩演員當咧搬《白賊七》、《金蘭義》遮的歌仔戲齣，國立傳統藝術中心對2016年舉辦到今已經第六冬的新秀舞台，這改除了延續雙劇種形式，閣增加專場演出，予一寡仔少年輩通有家己的機會。

明華園戲劇總團執行長陳昭賢表示：「這次伊(孫翠鳳)共這齣戲的精髓，參伊的表演的能量，攏傳授予王婕菱，包括眼神，包括目睭皮，愛偌鬆伊攏學著。」

傳藝中心表示，這改in改變往過的方式，採取公開徵選閣再由策展人邀請演出，總共有12个戲曲團、16个新秀，包括歌仔戲、客家、京劇等等劇種、予in通仝臺拚戲，就算歌仔戲觀眾也通看著無仝氣味。

唐美雲歌仔戲團團長唐美雲表示：「咱會當看著，雖然是歌仔戲，但是以無仝款的風格呈現，所以對少年人來講，是真好磨練的舞台。」

傳藝中心表示，這改的新秀舞台，也是一个傳承的意義，予逐家見證新一代的演員如何傳承資深藝師的功夫，劇展對10月20開始，佇台灣戲曲中心演到11月中。