今年雨水厚 新竹香山荔枝產量減3成.起價2成

果子樹頂懸的荔枝，並過去減誠濟，因為最近相連紲落大雨，今年新竹荔枝的產量大減。看天食飯的果農，感覺真無奈。

荔枝果農蔡明風：「減一半以上，南部荔枝產量嘛仝款，價數才會起價，為啥物減量，就雨水濟袂生，像我種的連小欉嘛無生。」

新竹市栽種荔枝的面積差不多有20公頃，原本產量有12萬斤，今年只賰4萬斤，毋過品質無受影響。
 

荔枝果農蔡明風：「舊年荔枝一斤賣60，今年賣90，今年就荔枝產量少。」
 

新竹市農會推廣主任陳學立：「新竹荔枝的口味，袂講一喙咬落去干焦有甜味，是會有淡薄仔的果酸味，以及荔枝獨特的風味，佇喙尾感覺嘛較khiū。」

新竹市今年總共有7間果子園，開放予民眾現場挽荔枝，採收期對6月底一直到7月中左右，愛食荔枝的民眾著愛把握上尾仔的產季。