臺北國際書展起鼓 設烏克蘭展區.法國主題館

臺北國際冊展今仔日佇臺北世貿一館舉行,今年除了特別設烏克蘭冊展區,也有烏克蘭插畫家的創作,甚至有法國主題館和臺灣本土意識的冊。佇出入口也攏有全身的消毒機,希望五日節連假,民眾會當安心踅冊展。

對保護國家的烏克蘭阿兵哥、逃難的烏克蘭居民到展翼仔的和平鳥,一筆一畫攏是平均二三十歲的烏克蘭插畫家對和平的向望,本身是烏克蘭首都基輔人,今年才19歲的Valentina,講雖罔猶咧逃難,不過伊自細漢就希望會當和國際分享烏克蘭的文化,伊真感謝台灣邀請伊來展覽。

烏克蘭Yakaboo圖書平台國際事務主任 Valentina Butenko表示:「真正足多謝台灣,我家己就是烏克蘭人,以烏克蘭集體來看,阮這馬當咧面對烏克蘭文化的消失,因為這場戰爭就是集體屠殺的戰爭,是整個烏克蘭文化滅絕的戰爭」

除了烏克蘭歷史文化和國族認同的冊,2022年台北國際書展猶有法國主題館,和濟濟台灣本土意識有關的冊,包括賴和全集、葉石濤小說集、也有改編漢詩、古典詩予囡仔看的書。

台灣文學館館長 蘇碩斌表示:「台灣文學館佇這區內面,策畫一个台灣文學史,60年代以來,文學是按怎衝破思想禁錮的範例,沓沓仔咱享受今仔日的自由」

台北書展基金會董事長 林訓民講:「以早一年大概有五十萬至七十萬入場民眾,阮希望如果有到過去的三分之一就袂䆀矣,阮會做上高級的防護,保護逐家的平安佮健康」

就驚疫情湠開,冊展6 个出入口,攏有設防疫門,提供全身消毒,文化部也表示今年有31个國家、364間出版社參展,也閣加捒20萬張100箍的「買冊抵用券」,入場的的民眾攏有塊提。
 

全台敬老金大調查

相關新聞