防疫照顧假無薪水通領 民團籲中央著補貼
鄭雅文 林郁凱 / 台北報導
發布時間：
更新時間：
這禮拜高中以下的學校真濟攏改線頂教學，也因為請防疫照顧假目前是無薪水，真濟家長嘛咧躊躇敢欲綴囡仔請假。今就有民間團體做伙呼籲政府，應該愛撥一寡預算來補貼請防疫照顧假的家長。
全台灣真濟高中以下的學校，這禮拜攏停課，一寡仔較欠資源的家庭壓力真大，婦女新知基金會25佮幾若个照顧公會做伙開線頂記者會，呼籲政府正視各種照顧體系強欲崩去的問題。
婦女新知基金會秘書長 覃玉蓉：「我到底敢愛共囡仔留踮托育機構，抑是共長輩留踮長照機構，敢會提懸in的感染風險。其實這兩个族群攏是死亡比率較懸的，這對真濟人來講，我是愛選擇我厝內人的性命抑是收入，這是足艱難的代誌。
婦女新知表示，政府以經濟為主，無欲強制企業停班，但是家長煞予挾佇中央兩爿為難，尤其是一寡仔閣較弱勢的家庭，親像有單親家庭婦女，就驚囡仔去學校若穢著，家己也袂當食頭路，生活是欲按怎過。In希望政府通用紓困預算做防疫照顧假的津貼。
台灣婦女展業協會秘書長 林香如(網路視訊)：「疫情起落的影響，單親的家長也感覺著急。因為in著愛家己照顧囡仔，閣愛來兼顧收入，加上欠缺支持的系統，根本就毋知影後援佇佗位。」
婦女新知建議，政府會當以前一冬勞工就業保險的平均投保薪資，做防疫照顧假的津貼標準，勞動部是表示，因為這馬的防疫照顧假，責任無法度歸責予雇主，所以無強制支付薪水，未來會閣再討論各界的意見。
2022杭州亞運 台灣百金之路
