高中以下學校拜五開學 新竹市當拚全面消毒

這禮拜五,高中以下學校就欲開學,因為防疫,各縣市攏開始進行校園消毒。新竹市是派環保局的人員入去校園內消毒公共空間,按算佇開學進前完成全市內69間學校的消毒工課。

清潔人員揹器材,來回濺藥仔消毒,這禮拜五就欲開學矣,面對疫情學校毋敢靠勢,開始進行校園環境清潔消毒,校長講針對開學彼工,學校嘛已經做好各項防疫規劃。

新竹市新科國中校長林燕玲:「開學進前老師攏會轉來學校,做上課的準備以外,閣有做環境清潔的部份。目前阮學校有33台額溫機,猶閣有一台溫控儀,閣有22台手部消毒感溫器,閣有20台藍光噴霧器。」

新竹市長林智堅嘛來到校園,關心開學前的消毒工課,另外閣提醒家長,做好家己佮厝內囡仔的健康管理。

新竹市長林智堅:「嚴格把關。只要有一个囡仔確診,規間學校就會停課14工。透過加強防疫規範,提早做好準備,希望守護每一个學生的健康。」

教育處嘛要求學校確認防疫物資數量,閣有老師第二筒疫苗預防射的狀況,確保校園環境安全。

相關新聞

專題|全台敬老金大調查