失智症新版連絡卡 無標籤隨身紮.毋驚受歧視

警政署統計,每兩位序大失蹤的事件內底,就有一件是因為失智症。另外有四成的警察認為,記錄失智症患者資訊的愛心手鍊,對警察鬥揣失蹤患者真有幫助。毋過序大驚講掛手鍊會受人歧視就攏無愛掛。失智症協會這馬推出一種新聯絡卡,提供無仝款的選擇。

踅過身,結佇揹仔的紅色鎖匙圈仔,抽出內底的卡片,有主人的基本資料等等。這是台灣失智症協會新推出的緊急連絡卡,會使予行毋知路的失智症序大,得著幫助。

內政部警政署防治組科長林大為:「有百分之卌的警察同仁認為掛愛心手鍊有幫助,倚三成的人認為GPS定位的輔具有幫助。」


失智症患者家屬葉水勝:「兩个是互補。GPS是主動,你會使主動去發現伊。這个(緊急連絡卡)是被動,當當有人發現、抑是伊講袂清楚的時陣我會使知影。」

根據警政署的統計,台灣舊年序大失蹤事件,大概有4500件;其中有2145件佮失智症有關係,大概每兩位失蹤的序大,就有一位是失智症。

台灣失智症協會秘書長湯麗玉:「規个失智人口的四分之三是輕度佮極輕度,輕度佮極輕度基本上行動能力攏真好。行動能力真好加上認知功能障礙,方向感無好就真會走失蹤。愛心手鍊真濟序大感覺真歹看、或者是貼標籤、掛狗牌仔仝款。厝內人攏會使來試看覓,這个較親切的緊急聯絡卡。」

協會表示,緊急連絡卡佇設計的時,無任何失智症的標籤,除了提升患者的使用意願,一般民眾嘛會使佇頂懸記錄家己的醫療狀況,當作一般醫療資訊卡來使用。

全台敬老金大調查

相關新聞