塔利班現原形 銃殺4綁票犯閣共身屍吊佇廣場
徐家仁 / 編譯
發布時間：
更新時間：
塔利班閣重新掌控阿富汗的時陣，雖然有頓胸坎掛保證，袂閣用往過統治阿富汗的手段，毋過其實這早就予人看出出，才過無偌久爾，就破功矣。毋但講會以嚴格的伊斯蘭律法約束人民一切行為，嘛無愛接受外界任何的意見。頂日佇西部的大城，有4个共人綁票的嫌犯，去予塔利班用銃彈死了後，竟然共這4个嫌犯的屍體，用吊車吊予懸懸懸，四界公開展示，這款的手段實在有夠粗殘。
赫拉特街路這個大埕聚集濟濟人陣，逐家徛佇這隻吊車邊仔，毋是車本身有特別的所在，是因為吊車頂懸掛一具流血流滴的死體。外國媒體引用塔利班的訊息指出，4个嫌犯共當地1个生理人佮𪜶後生綁票，結果去予塔利班臨檢的時爆發銃戰，嫌犯全部予塔利班用銃彈死。了後予人𤆬去赫拉特無仝的4个地點，用吊掛的方式公開展示。
塔利班幹部：「這是為著刣雞教猴，欲警告犯罪份子。」
毋過英國廣播公司BBC等外國媒體的報導講，這4个人佇啥物狀態之下予人刣死，外界完全無法度查證。另外，阿富汗人民愛面對閣較嚴重的問題是經濟。
喀布爾居民表示：「阮從出日做工課做到暗，往過一工猶有趁500箍(臺票157箍)，毋過這馬逐工干焦有200箍(臺票63箍)，甚至干焦100箍(臺票31箍))。」
前阿富汗政府公務員法奇里表示：「真濟人攏過甲真悽慘，我較早做公務人員，一個月月給三萬二(臺票萬外)，這馬無頭路矣。」
外國媒體的報導指出，8月底進前離開阿富汗的人，共會當領出來的錢全部紮走。加上長久以來的政府𠢕食錢，規个國家陷入經濟學所謂的"流動性陷阱"。也就是說，就算外國解除制裁，捧濟濟現金去阿富汗，經濟體系就親像漏水的捾桶仝款，袂有啥物效果。
2022杭州亞運 台灣百金之路
