新竹縣市爭取升格第7都 林智堅提出.楊文科贊聲

新竹市長林智堅喝出,新竹縣市愛合體,升格成做第7都。今仔日佇記者會講著,新竹縣市逐年替臺灣創造欲到2千億的稅收,煞因為制度的關係,稅款的分配、攏比人較少。若準縣市合併成做第七都,就有較濟的資源來做建設。這个想法,新竹縣長楊文科也誠贊成。

根據地方制度法規定人口愛有125萬人的條件,才有資格升格直轄市(ti̍t-hat-tshī)。新竹市長林智堅表示,新竹雖然戶籍人數確實無夠,毋過實際蹛佇大新竹的人口有120萬人,而且縣市的民眾攏真期待大新竹未來的發展。

新竹市長林智堅講,「其實新竹縣市生活的民眾攏知影,阮對外縣市來的人口誠濟。民國71年縣市拆伙鼎,是歷史的小插曲,明年就滿40冬,阮希望佇民眾攏有共識之下(來進行),閣較歡喜楊文科縣長佮我仝款,無分藍綠攏想欲推動縣市合併,升做直轄市。


新竹縣長楊文科嘛表示,新竹的科技產業佇台灣佔非常重要的地位,嘛真歡喜縣市有共識,希望中央會使共升格直轄市的人口數,降至100萬人。

新竹縣長楊文科也表示,「想法仝款,阮就希望做伙來拍拚。仝時陣我嘛欲連鞭來揣林市長,佮新竹地區的立委做伙坐落來討論,按怎予修法的速度會使閣較緊。」

目前新竹市人口45萬2千外人,閣加上新竹縣的57萬3千外人,縣市總人口102萬6千外人,若是欲升做第7个直轄市,閣有誠大的空間。抑若無欲修法縣市就合併,預算的效益可能有限。

全台敬老金大調查

相關新聞