流浪狗做校犬照顧 學校閣推動性命教育受肯定

新北市安溪國中的校犬可樂，佮學生耍做伙，11冬前流浪到安溪國中、揣無主人，學校落尾決定予可樂留落來，嘛予伊參與真濟學校活動，成做學生佮老師生命教育的主角。

安溪國中老師姜大如表示：「因為逐家攏需要鬥相共，伊毋是屬於啥人的狗。你照顧伊的食飯、醫療等等，予阮有一个團隊的精神。只要可樂一出現，學生就會真專心，這是阮上佮意的所在，阮感覺可樂是來教育阮的。」

台灣動物保護行政監督聯盟秘書長何宗勳表示：「因為毋是所有的家長佮老師攏支持校犬，因為我發見這个過程的討論，甚至愛投票，就是真好的校園公民參與。」

初三立法院來了真濟狗仔，in是各學校的校犬，動保團體這工頒獎予in的學校，共校犬佮生命教育做真好的配合。雖講遮的校犬攏是真成功的案例，毋過校園飼狗有真濟問題愛克服，毋是逐間學校會當喝飼就飼。

台灣動物保護行政監督聯盟秘書長何宗勳表示：「有一寡仔收容所需要減輕收容所的壓力，拄好學校閣需要流浪狗來做校犬的時陣，過程的協調需要一寡仔時間。真濟家長講狗敢會攻擊囡仔、敢會影響囡仔上課、狗有傳染疾病等等。」

校犬成做學校生命教育的主角，毋過嘛有問題需要克服，農委會主委陳吉仲佇現場宣布，只要學校願意推動校犬計畫，所有經費攏由農委會負責，目前大概有40間學校有校犬，農委會會佮教育部合作，共計畫推捒到閣較濟學校。