臺灣有超過5成的車禍攏是發生佇路口，交通部運輸研究所，最近佇臺北佮高雄，揣15个路口，利用無人機結合影像辨識技術，共路口的人佮車，徙振動的跤跡記錄落來，來分析捷發生事故的路口，愛按怎做才會當改善。
工作人員操控無人機沓沓仔飛起來，透早上課上班時段，佇中山、興中路口，真濟轎車佮機車，遮是高雄九个危險路口之一，搖控無人機飛佇80公尺的懸度翕影像，轎車甚至是過路人按怎過路口，攏看甲真清楚。
高雄市交通局主祕，許啟明表示：「重點是路口機會倒斡，佮穿越衝突的研究，這兩个部份，阮研究起來是側挵較濟，這九个路口，平均百分之三十七是側挵會發生。」
搖控無人機空中翕影像了後，利用AI人工智慧影像辨識技術，共影像轉換成做人車流動的軌跡，軟體會當進一步分析，揣出路口容易發生車禍的地點。
高雄市交通局主祕，許啟明表示：「咱規个路口一百空三公尺的範圍內底，咱全部攏看會著，所以入來路口按怎轉踅咱攏看會著，咱用這種來改較全面。」
交通部運輸研究所表示，無人機佇空中干焦會翕著車頂佮過路人的頭頂，無侵犯民眾隱私的問題，𪜶今年是佮台北、高雄合作，揀十五个路口來研究，希望未來提升路口安全。