"臺灣風俗誌"改編囡仔古 章世和寫出本土故事

發生佇曾文溪畔的百足真人蜈蚣陣傳說、上gâu揣物件的府城西羅殿二爺，閣有強欲失傳的臆謎猜，一篇一篇精彩的囡仔古，這陣會使透過有聲繪本來認捌。一般市面上較捷看著國外的童話冊，有團隊參考《臺灣風俗誌》加上實際訪問調查，推出台灣本土的奇幻故事。

奇幻!真台灣作者 章世和講，「百冬前台灣人遮的故事，其實誠濟攏已經失去矣，是咱過去生活的一寡仔資料、一寡仔物件這馬失去，咱倒轉去共揣轉來，予逐家了解咱過去到這馬的故事，是生做啥物形」

章世和表示，伊細漢就聽真濟神明的故事參鬼仔古，遮的故事也代表著台灣的文化參民俗，希望透過有聲冊，用生動活潑的囡仔古，予台灣文化莫斷根。

配音員 陳芳雪講，「有閻羅王閣有二爺，對我來講閻羅王是毋是愛加淡薄仔威嚴，二爺的話我就是用彼个小可仔用個性啦，二爺是按呢、閻羅王是按呢，雖然有壓落去的部份，毋過敢若有聽著另外一个情緒。」

章世和對台灣文化出發，寫出本土的囡仔古，繪本也邀請金曲歌王謝銘祐、立委林昶佐，作家黃越綏，知名配音員陳芳雪，用台灣話講出上在地的傳奇故事。