8/16下晡，三重埔有一位家庭看護移工，出門去倒糞埽，煞有一位警察共叫來權問。毋過移工的證件無紮佇身軀頂，就共𤆬轉去派出所。落尾問問咧，無問題才放人。毋過這個移工，路頭生疏揣無路轉去，落尾向工會討救兵。三重埔分局已經承認錯誤，而且用妨害自由，共這个警察移送地檢署。
警察行進前大聲喝欲盤查移工，移工只是出外倒糞埽無紮證件，想欲用手機仔提證件相片予警察看，但是兩人愈講愈激動，落尾警察竟然用手銬共移工銬起來，用警車載轉去派出所。
桃園市家庭看護工職業工會秘書長，黃姿華表示：「共這位移工的手機仔搶走，無欲予伊繼續揣，嘛無愛予伊聯絡雇主，移工敲電話予我，希望我佮警察說明伊毋是違法移工，抑是講問清楚到底想欲按怎，我佇電話上嘛是一直叫這位警察，但是伊無欲插我，落尾閣共電話掛掉。」
經過調查，警察確認伊毋是違法移工欲放人，煞共載去別位，無𤆬轉去原底的所在，揣無路轉去的移工落尾是閣再向工會討救兵，才揣著轉去的路
黃姿華講：「距離大概12分鐘的行路時間，家庭看護工的生活範圍真細，就算只有12分鐘，伊若是無去過，伊嘛毋知佇佗位。」
三重分局分局長，林故廷表示：「本分局已經記過一擺，而且以上嚴格的處罰，用刑法妨害自由罪，移送新北地檢署偵辦，而且共員警調到警備隊，等待司法偵審。無共伊𤆬轉去原位，我認為這是嚴重的錯誤，阮嘛會處分。」
黃姿華表示，移工受著違法盤查的消息工會一直攏有聽過，有時陣警察主觀認定對方的眼神可疑，就算無犯罪的嫌疑，就欲進行盤查。伊認為這是長久以來警察的歹習慣，應該愛檢討。